Namangan xalqaro aeroportidan Moskvaga parvozni amalga oshirishi rejalashtirilgan samolyot dvigatelidagi nosozlik sabab parvoz to‘xtatilgan.
Joriy yilning 3 may kuni soat 19:50 larda «REDWINGS» aviakompaniyasi tomonidan «Namangan-Moskva» yo‘nalishida charter aviareysini amalga oshirish rejalashtirgan edi. Ammo havo kemasining texnik nosozligi tufayli ushbu parvoz vaqtincha qoldirildi.
«Yo‘lovchilarning bir qismi Namangan shahridagi mehmonxonalardan biriga joylashtirilgan va kerakli shart-sharoitlar yaratib berildi», deya xabar bermoqda aeroport matbuot xizmati.
Mehmonxona xarajatlari aviakompaniya tomonidan qoplangan.
Aeroport matbuot xizmatining qo‘shimcha qilishicha, hozirda aeroport va aviakompaniya hamkorligida muammo tezkorlik bilan bartaraf etish chora-tadbirlari ko‘rilgan.
Qoldirilgan aviareys bugun, 4 may kuni amalga oshirish rejalashtirilmoqda.
