Putinning qayd etishicha, yaqin vaqt ichida xorij fuqarolari ishga joylashish uchun barcha hujjatlarni onlayn rasmiylashtirishi mumkin bo‘lgan «Chegarasiz ish» yagona internet tizimi va ilovasi ishga tushadi.
Rossiya prezidenti Vladimir Putin RF yaqin xorij mamlakatlaridan kelayotgan mehnat migrantlari uchun sharoitlarni yaxshilashga urinayotganini aytdi.
«Rossiya xorij mamlakatlaridan, birinchi navbatda, YeOIIga a'zo davlatlardan ishlash uchun kelayotgan fuqarolarga sharoitlarni maksimal darajada yaxshilashga harakat qilmoqda va harakat qiladi», – dedi u Yevrosiyo oliy iqtisodiy kengashining videokonferensiya shaklida o‘tkazilgan navbatdagi yig‘ilishida.
Putinning qayd etishicha, yaqin vaqt ichida «Chegarasiz ish» yagona internet tizimi va ilovasi ishga tushadi.
Uning ma'lumot berishicha, bu orqali xorij fuqarolari ishga joylashish uchun barcha hujjatlarni onlayn rasmiylashtirishi mumkin bo‘ladi.
Eslatib o‘tamiz, bugun, 21 may kuni videokonferensiya shaklida Yevrosiyo oliy iqtisodiy kengashining navbatdagi yig‘ilishi bo‘lib o‘tdi. Unda Armaniston bosh vaziri vazifasini bajaruvchi Nikol Pashinyan, Belarus prezidenti Aleksandr Lukashenko, Rossiya prezidenti Vladimir Putin, Kuba prezidenti Migel Dias-Kanel Bermudes, O‘zbekiston prezidenti Shavkat Mirziyoyev, Qirg‘iziston prezidenti Sadir Japarov, Qozog‘iston prezidenti Qosim-Jo‘mart To‘qayev, Qozog‘istonning birinchi prezidenti Nursulton Nazarboyev va Yevrosiyo iqtisodiy komissiyasi raisi Mixail Myasnikovich ishtirok etdi.
Anjumanda so‘zga chiqqan O‘zbekiston prezidenti YeOIIga a'zo davlatlar o‘rtasida muntazam aviaqatnovlarni tiklashni taklif qildi.
