10:27 / 03.06.2021
8877

Eron va MAR BMT Bosh Assambleyasida ovoz berish huquqidan mahrum etildi

BMT Bosh Assambleyasida Eron va Markaziy Afrika Respublikasi ikki yil davomida tashkilotga badal pulini to‘lamagani sababli ovoz berish huquqidan mahrum etildi. Bu haqda BMT bosh kotibi Antoniu Guterrishning Bosh Assambleya 75-sessiyasi raisi Volkan Bo‘zkirga yuborgan maktubida aytilgan.

Ta'kidlanishicha, badal qiymati mamlakatning aholi jon boshiga daromadi hisobga olingan holda 10 yillik yalpi ichki mahsulot o‘rtacha ko‘rsatkichi va tashqi qarzi bo‘yicha belgilanadi. Ta'kidlanishicha, hisob-kitoblarga ko‘ra, Eron BMTga 16 mln dollardan, MAR esa 29 ming dollardan ko‘proq badal to‘lashi lozim. 

Ma'lumotlarga ko‘ra, BMTga a'zo davlatlardan umumiy hisobda 5ta mamlakat – Eron, MAR, Komor orollari, Somali hamda San-Tome va Prinsipi badal to‘lovi bo‘yicha qarzdorlikka ega. Biroq Eron va MARdan tashqari qolgan barcha davlatlar Bosh Assambleyaning 75-sessiyasi oxiriga qadar ovoz berish huquqini saqlab qolgan.

Ta'kidlanishicha, BMTga a'zo davlat qarzdorligi oxirgi 2 yilda to‘lanishi kerak bo‘lgan badal puliga teng bo‘lsa yoki undan oshib ketsa, u Bosh Assambleyada ovoz berish huquqidan mahrum etiladi.  

Top