Jinoyat ishlari bo‘yicha Buxoro viloyat sudi tomonidan qidiruv e'lon qilingan retsidiv firibgar Andijonda qo‘lga olingan. Bu haqda viloyat IIB xabar bermoqda.
Ma'lum qilinishicha, Jinoyat kodeksining 25, 168-moddasi 3-qismi «b» bandi, 28, 211-moddasi 2-qismi «a» bandida ko‘rsatilgan jinoyatlarni sodir etganlikda aybli deb topilib, sud idoralaridan yashirinib yurgan shaxs Andijon viloyati Izboskan tumanida qo‘lga olingan.
Qayd etilishicha, Buxoro shahar Safedmo‘y ko‘chasida ro‘yxatda turuvchi, muqaddam 2 marotaba (Jinoyat kodeksining 168, 228-moddalari bilan) sudlangan, 1991 yilda tug‘ilgan R.O.ga nisbatan jinoyat ishlari bo‘yicha Buxoro shahar sudi tomonidan 2021 yil 3 iyun kuni qidiruv e'lon qilingan.
Viloyat IIB hamda Buxoro shahar IIO FMB xodimlari tomonidan o‘tkazilgan tezkor-qidiruv tadbiri natijasida mazkur shaxs Andijon viloyati Izboskan tumanida yashirinib yurgani aniqlanib, qo‘lga olingan. U tegishli tartibda Buxoro viloyati IIB PPX va JTSB vaqtincha saqlash hibsxonasiga joylashtirilgan.