Samarqand viloyati Payariq tumanida Isuzu avtobusi va Damas o‘zaro to‘qnashgan. Oqibatda ikki kishi vafot etgan. Bu haqda viloyat IIB YHXB xabar bermoqda.
Ma'lum qilinishicha, 2021 yil 1 iyul kuni soat 12:00 larda, davlat ahamiyatidagi 4R-48 avtomobil yo‘lining Payariq tumani «Eshimoqsoq» MFY hududidan o‘tuvchi 26-kilometrida odam o‘limi bilan bog‘liq yo‘l-transport hodisasi sodir bo‘lgan.
O‘z yo‘lida kelayotgan, «Jizzax-Gagarin-Samarqand-Payariq» yo‘nalishida aholiga xizmat ko‘rsatuvchi Isuzu avtobusining yo‘liga, qarama-qarshi tomondan harakatlanib kelayotgan Damas mashinasi chiqib ketib, to‘qnashuv sodir etgan. Oqibatda, Damas ichida bo‘lgan ikki nafar fuqaro og‘ir tan jarohatlari olib, hodisa joyida vafot etgan.
Mazkur yo‘l-transport hodisasi natijasida Damas batamom yaroqsiz holga kelgan. Avtobus ag‘darilib ketib, jiddiy shikastlangan.
Qayd etilishicha, holat yuzasidan Samarqand viloyati IIB huzuridagi tergov boshqarmasi tomonidan Jinoyat kodeksining 266-moddasi 3-qismi bilan jinoiy ish qo‘zg‘atilgan.
