Shveytsariya Yevropa ittifoqining Belarusga qarshi sanksiyalar kiritish qaroriga qo‘shildi. Shveytsariyaning sanksiyalar ro‘yxatiga Belarusning 78 nafar jismoniy shaxsi va 7ta tashkiloti kiritilgan.
Jumladan, sanksiyalar ostiga Belarus prezidenti Aleksandr Lukashenko, uning o‘g‘illari Viktor va Dmitriy hamda to‘ng‘ich o‘g‘li Viktorning rafiqasi Liliya ham tushgan.
Bundan tashqari, sanksiyalar ro‘yxatiga rossiyalik biznesmen Mixail Gutseriyev ham kiritilgan.
Iyunda Yevropa ittifoqi Belarusda inson huquqlari buzilishiga javoban 78 nafar belaruslik jismoniy shaxs va 8ta tashkilotga qarshi sanksiyalar kiritgandi.
Bundan avvalroq, iyunda Yevropa ittifoqi kengashi Belarus aviakompaniyalariga Yevropa ittifoqi davlatlari havo hududidan foydalanish hamda aeroportlariga kirish taqiqlanishini e'lon qilgandi.
Ayni vaqtda Belarusning 166 jismoniy va 15 yuridik shaxsi Yevropa ittifoqi sanksiyalari ostida qolmoqda.
