Ozarboyjon prezidenti Ilhom Aliyev Boku Yerevanga tinchlik sulhini imzolashni yana bir bor taklif qilganini ma'lum qildi. U bu haqda Ozarboyjon davlat televideniyesiga bergan intervyusida aytib o‘tdi.
“Biz Armanistonga tinchlik sulhini tuzishni taklif qildik. Agar sulh tuzishni istamasa, buni aytsin. Men ularga “biz tayyormiz, muzokaralarni boshlaylik” deb bir necha marta aytdim. Urush tugadimi? Tugadi. Sen tinchlikni xohlayapsanmi, Armaniston? Aftidan xohlayapsan. Unda tinchlik sulhini nega imzolamaysan?” deb savol bilan yuzlangan Aliyev.
Ozarboyjon rahbari Yerevanni Ozarboyjonning hududiy yaxlitligini tan olish, tinchlik sulhini imzolash va chegaralarni delimitatsiya qilish masalasini hal qilishga chaqirgan. Uning ta'kidlashicha, Bokuning bu masaladagi pozitsiyasi Yevropa ittifoqi, Turkiya va Rossiya pozitsiyasi bilan mos tushadi.
2020 yil sentyabr oxirida Tog‘li Qorabog‘da Ozarboyjon va Armaniston o‘rtasida jangovar to‘qnashuvlar boshlangandi. 10 noyabrga o‘tar kechasi Rossiya, Ozarboyjon va Armaniston o‘t ochishni to‘xtatish, Qorabog‘ga Rossiya tinchlikparvar kuchlarini kiritish va Ozarboyjonga bir qator hududlarni berish haqidagi uch tomonlama bayonotni qabul qilgan.
