Sirdaryo viloyati Sirdaryo tumanida «GAZ-53» yuk mashinasi haydovchisi boshqaruv paytida uxlab qolib, yo‘l-transport hodisasi sodir etgan. Oqibatda haydovchi vafot etgan, uning yonida ketayotgan shaxs shifoxonaga yotqizilgan. Bu haqda viloyat IIB xabar bermoqda.
Ma'lum qilinishicha, bugun, 23 iyul kuni tonggi soat 6:00larda M34 Toshkent-Dushanbe xalqaro avtomobil yo‘lining Sirdaryo tumani hududidan o‘tgan 75-kilometrida odam o‘limi bilan bog‘liq yo‘l-transport hodisasi sodir bo‘lgan.
Samarqand-Toshkent yo‘nalishida harakatlanib ketayotgan «GAZ-53» yuk mashinasi yo‘l chetidagi daraxtga urilgan. Oqibatda «GAZ-53» haydovchisi og‘ir tan jarohatlari olib, voqea joyida vafot etgan. Mashina salonida bo‘lgan yana bir shaxs esa og‘ir tan jarohatlari olib, shifoxonaga yotqizilgan.
Dastlabki surishtiruvda aniqlanishicha, «GAZ-53» haydovchisi harakatlanish davomida uxlab qolgan va boshqaruvni yo‘qotgan.