21:20 / 28.07.2021
6949
Bayden global isish dunyoda yangi nizolarga sabab bo‘lishi mumkinligini aytdi

Uning so‘zlariga ko‘ra, Amerika harbiylari iqlim o‘zgarishini AQSh uchun eng katta tahdid deb hisoblaydi.

Foto: AP Photo/Susan Walsh

Global isish AQSh va butun dunyo uchun beqarorlik keltirib chiqarishi, haydaladigan yerlar uchun nizolar yuz berishi mumkin. Bu haqda AQSh prezidenti Jo Bayden razvedka hamjamiyati xodimlari va rahbariyati bilan uchrashuvida aytdi.

"Iqlim o‘zgarishi bilan bog‘liq holatlar mamlakatimiz va butun dunyoda beqarorlik o‘sishiga sabab bo‘lmoqda. Bular insonlar o‘limiga olib kelayotgan ob-havo hodisalari, oziq-ovqat va suv xavfsizligi yo‘qligi, dengiz sathi ko‘tarilishi kabilardir", – dedi AQSh prezidenti.

Uning so‘zlariga ko‘ra, Amerika harbiylari iqlim o‘zgarishini AQSh uchun eng katta tahdid deb hisoblaydi.

"Agar dengiz sathi yana 2,5 fut (0,76 m) ko‘tarilsa, millionlab odamlar ko‘chib ketadi, haydaladigan yerlar uchun jang qiladi. Shimoliy Afrikada nima bo‘lganini ko‘rdingiz", – dedi Bayden.

Oq uy rahbari shuningdek, taxminlarga ko‘ra, yaqin o‘n yil ichida Indoneziya poytaxti boshqa joyga ko‘chirilishini, chunki Jakarta suv ostida qolishi mumkinligini aytdi.

Indoneziya prezidenti Joko Vidodo 2019 yilda mamlakat poytaxti Kalimantan oroliga ko‘chirilishini aytgandi.

Mavzu
Iqlim o‘zgarishlari
Iqlim o‘zgarishlari natijasida Yer yuzining turli nuqtalarida ekstremal ob-havo kuzatilmoqda.
Barchasi
Top