Zarafshon daryosiga “Navoiyazot” tomonidan chiqarilgan zararli moddalar sabab yetkazilgan zarar miqdori 5 mlrd so‘mga yaqin. Bu haqda Davlat ekologiya qo‘mitasi rahbari o‘rinbosari Islombek Boqijonov AOKAda bo‘lib o‘tgan matbuot anjumanida ma'lum qildi.
Boqijonovga ko‘ra, “Navoiyazot” AJ tomonidan tashlangan zaharli chiqindilar sabab ko‘plab baliqlarning nobud bo‘lishi holati 30 dan ortiq inspektorlar tomonidan o‘rganilib, chora-tadbirlar ishlab chiqilgan. Ushbu voqeada faqatgina tabiatga yetkazilgan zarar miqdorining o‘zi 4 mlrd 800 mln so‘mdan ko‘proq ekani aniqlangan.
“Zarafshon daryosi suvini zaharlagan bu tashlamalar “Navoiyazot” AJdan chiqayotgani aniqlangan. Bu suvning tahlilida aniqlanishicha, undagi zararli moddalar miqdori besh baravargacha ortib ketgan. Barcha ma'lumotlarni Respublika Bosh prokuraturasiga taqdim qilganmiz, holatga huquqiy baho berish ular tomonidan ko‘rib chiqiladi”, dedi Ekoqo‘m raisi o‘rinbosari.
Aytilishicha, mazkur holat uchun “Navoiyazot” AJ javobgar sifatida jalb etiladi.
Avvalroq, “Navoiyazot” AJga qarashli 267-quduqdan Zarafshon daryosiga hayot uchun xavfli moddalar chiqarilgani haqida xabar berilgan edi.
Ushbu moddalar sabab daryo suvida azot ammoniy 21 marotaba, azot nitrat 2,6 marotaba, azot nitrit 60 marotaba, xloridlar 1,3 marotaba, mis ionlari 2,1 marotaba belgilangan me'yorlardan oshib ketgan. Oqibatda daryoda yoppasiga zaharlanish yuzaga kelib ko‘plab baliqlarning o‘limiga sabab bo‘lgan edi.
Aytilishicha, bu baliqlar orasida “Qizil kitob”ga kiritilganlari ham bor.
O‘zbekiston Ekologik partiyasi “Navoiyazot” AJ mas'ullari jamoatchilikka tushuntirish berishlarini talab qildi.
