22:47 / 21.10.2021
15404
“Texnik” sabab bilan uch marta kechikkan reys: Buning uchun javobgarlik yo‘qmi?

Uzbekistan Airways'ning mahalliy reysi bir necha bor kechiktirildi. Mas'ullar buni texnik sabab deya izohlashdi. Ammo Kun.uz muxbiri o‘zi tushgan bu holat texnik sabab ekaniga ishonmadi.

17 oktabr kungi Termiz–Toshkent yo‘nalishi bo‘ylab chipta xarid qilgan muxbir poytaxtga uch marta kechiktirilgan parvoz orqali yetib keldi.

12:15 ga belgilangan reys avvaliga 16:30 ga kechiktirildi, keyin 18:30 gacha qoldirildi, so‘ngra reys vaqti yana surildi – bu safar 19:00 ga. Shunda ham samolyot 19:21 da havoga ko‘tarildi.

“Termiz aeroportida reysning kechiktirilishi “texnik nosozlik” deb izohlandi. Biroq uzoq kutilgan uchib ketish avvalidagi holat bu izohga nisbatan shubha uyg‘otishi mumkin edi.

Gap shundaki, soat 19:00 dan keyin samolyot illyuminatoridan bir holatni ko‘rish mumkin edi: terminal tomondan 20 ga yaqin yo‘lovchi shoshilgancha oldinma-ketin samolyot tomon yugurib kelardi. Vaholanki, bu vaqtda yo‘lovchilarning bortga chiqishi to‘xtatilgani allaqachon e'lon qilingan, boz ustiga, kechikkan yigitlarning aksari kostyumda ekani ular bir jamoa ekaniga ishora qilardi.

Nima bo‘lganda ham, rasmiy izoh maksimal darajada qisqa: “texnik nosozlik!” Aynan qanday nosozlik ekani haqida mijozlarga biroz bo‘lsa-da qo‘shimcha ma'lumot berishni milliy aviakompaniyamiz o‘ziga ep ko‘rmadi.

Biz kutish davomida mas'ullardan bunday holatda yo‘lovchilar uchun qandaydir chegirma, kompensatsiya yoki boshqa imtiyoz ko‘zda tutilgani yoki yo‘qligiga qiziqdik.

Dastlab savollarimizga jiddiy qaramagan, mas'ullar jurnalist ekanimizni aytganimizdan keyin darrov o‘zgarishdi. Savollarimizga amallab javob ola oldik (batafsil – videoda), biroq... Reys kechikkani uchun yo‘lovchilarga kompensatsiya to‘lanishi ko‘zda tutilgan, deb ma'lum qilgan mas'ul keyinchalik telefoni go‘shagini ham ko‘tarmadi, hech kimga kompensatsiya to‘lanmadi ham”, – deya hikoya qiladi muxbirimiz.

Havo transportida yo‘lovchi va yuk tashish qoidalariga ko‘ra, parvoz tashuvchi tomonidan belgilangan aniq vaqtdan kechiksa, tashuvchi yo‘lovchiga yetkazilgan zararni qoplashi shart.

“Iste'molchilarning huquqlarini himoya qilish to‘g‘risida”gi qonunning 19-moddasiga ko‘ra, xizmat ko‘rsatish to‘g‘risidagi shartnoma shartlari buzilgan taqdirda, iste'molchi ko‘rsatilgan xizmat narxi kamaytirilishini talab qilishga haqli.

Iste'molchilar huquqlarini himoya qilish to‘g‘risidagi qonunchilikni buzganlik uchun Ma'muriy javobgarlik to‘g‘risidagi kodeksning 178-moddasiga binoan ma'muriy javobgarlik belgilangan.

Transport vazirligi, Monopoliyaga qarshi kurashish qo‘mitasi va Iste'molchilar huquqlarini himoya qilish agentligi kabi mutasaddi tashkilotlardan parvozni kechiktirganlik uchun aviakompaniyaning mijozlar qarshisidagi javobgarligi qanday bo‘lishi kerakligi borasida munosabat bildirishni so‘rab qolamiz.

Ma'lumot o‘rnida aytish lozimki, Havo transportida yo‘lovchi va yuk tashish qoidalariga asosan, parvoz kechikkanda yo‘lovchiga tashuvchi tomonidan quyidagi qo‘shimcha bepul xizmatlar ko‘rsatilishi kerak:

  • bir marotaba telefon orqali gaplashish yoki telegramma yuborish yoki boshqa aloqa xizmatlaridan foydalanishni ta'minlash;
  • parvozgacha kutish davrida yoki transportning boshqa turi orqali tashishgacha bo‘lgan vaqtda oziq-ovqat va ichimlik suvi bilan ta'minlash;
  • tashuvchi qoidalarida belgilangan muddat kutish vaqtidan ko‘ra ko‘proq bo‘lsa, mehmonxona bilan ta'minlash;
  • kutish vaqtida transport orqali aeroportdan vaqtinchalik yashash joyigacha eltib qo‘yish va qaytishni ta'minlash;
  • chiptada nazarda tutilgan tutash reyslarga kechikish bilan bog‘liq xarajatlarni to‘lash.
Top