O‘zbekiston Tabiatni muhofaza qilish xalqaro ittifoqi – TMXIga a'zo bo‘ldi. Bu haqda Ekologiya va atrof-muhitni muhofaza qilish davlat qo‘mitasi xabar qildi.
O‘zbekiston Markaziy Osiyoda ittifoqqa a'zo bo‘lgan birinchi davlat, dunyoda esa 92-davlatga aylangani to‘g‘risida ma'lumot berilgan.
Tabiatni muhofaza qilish xalqaro ittifoqi 1948 yilda YuNESKO tashabbusi bilan tashkil etilgan. Bugungi kunda ittifoqqa 91ta davlat va 120ta davlat tashkiloti a'zo.
Ittifoq bioxilma-xillikni saqlash sohasida tadqiqotlar olib boruvchi, tabiatning yaxlitligini saqlash va tabiiy resurslardan oqilona foydalanishga hissa qo‘shuvchi dunyoda yetakchi tashkilot hisoblanadi.
Rasmiy bayonotga ko‘ra, ittifoqda ishtirok etish O‘zbekistonga ekologik loyihalar uchun Global ekologik fond va Yashil iqlim jamg‘armasi grantlarini jalb qilish, shuningdek, atrof-muhitni muhofaza qilish sohasida strategik hujjatlarni ishlab chiqish imkonini beradi.
