Bugun, 19 noyabr kuni O‘zbekiston musulmonlari idorasi raisi, muftiy Nuriddin Xoliqnazarov Qirg‘iziston musulmonlari idorasi raisi, muftiy Zamir Rakiyev bilan uchrashdi.
Musulmonlari idorasi matbuot xizmatining ma'lum qilishicha, uchrashuvda Qirg‘iziston Din ishlari bo‘yicha davlat komissiyasi raisi Toyganbay Abdikarov va Vazirlar Mahkamasi huzuridagi Din ishlari bo‘yicha qo‘mita raisi Sodiq Toshboyev ham qatnashgan.
Uchrashuvda ikki davlat o‘rtasidagi aloqalar kengayib borayotgani, diniy-ma'rifiy sohadagi hamkorlik munosabatlari yangi bosqichga ko‘tarilgani qayd etilgan.
Muftiy Nuriddin Xoliqnazarov ikki davlat ulamolari Islom dini ma'rifatini keng yoyish, mo‘min-musulmonlar birdamligini ta'minlash va ikki qardosh xalq orasidagi do‘stlikni rivojlantirish, diniy idoralar o‘rtasidagi hamkorlikni ravnaq toptirishda juda ham katta ishlar amalga oshirilayotganini bildirdi.
Muftiy Zamir hoji Rakiyev boshchiligidagi bir guruh qardosh qirg‘izistonlik ulamolar Toshkent shahridagi «Hazrati Imom» masjidida birgalikda juma namozini ado etdi.
Mehmonlar shuningdek, Usmon Mushafini ziyorat qilib, Toshkent islom instituti faoliyati bilan yaqindan tanishdi.
