Kecha Qoraqalpog‘istonda talaba is gazidan zaharlanib vafot etgani haqida xabar bergandik. Bugun holat yuzasidan Qoraqalpog‘iston prokuraturasi rasmiy ma'lumot berdi.
Ma'lum bo‘lishicha, 24 noyabr kuni soat 07:00 larda Nukus shahri, 22-kichik tuman 8/6-uy, 43-xonadonda ijarada yashovchi, Nukus davlat pedagogika institutining talabasi R.R. (erkak) xonadonda o‘rnatilgan isitish qozonidan sizib chiqqan is gazidan zaharlanib, vafot etganligi aniqlandi.
Mazkur holat yuzasidan marhum R.R.ga nisbatan sud-tibbiy ekspertizasi tayinlangan.
Hozirda holat bo‘yicha Nukus shahar prokuraturasi tomonidan tergovga qadar tekshirish harakatlari olib borilmoqda.
Tekshirish davomida aniqlanishicha, mazkur uyda shu kuni marhum R.R.dan tashqari 6 nafar kishi bo‘lib, marhum R.R. oshxonada, qolgan 6 nafari boshqa xonalarda uxlaganligi sababli ulardan hech biri is gazidan zaharlanmagan.
Qo‘shimcha qilinishicha, tekshirish harakatlari Qoraqalpog‘iston Respublikasi prokuraturasi tomonidan nazoratga olingan.
Ma'lumot uchun, vafot etgan talaba 2003 yil To‘rtko‘l tumanida tug‘ilgan. U institutning fizika-matematika fakultetida tahsil olardi.
Bundan oldin Qoraqalpog‘istonda bir yilda 19 nafar odam is gazidan zaharlanib, halok bo‘lgani xabar qilingandi.
