O‘zbekistonning tog‘li hududlarida qor ko‘chkisi xavfi e’lon qilindi. Bu haqda FVV xabarida aytilgan.
Qayd etilishicha, 2022 yilning 28 yanvar kunidan 31 yanvar sanasigacha respublikaning tog‘li hududlarida qor ko‘chkisi xavfi e’lon qilindi.
“Hurmatli fuqarolar! Ehtiyotkorlik choralarini ko‘rishingizni va «Diqqat! Qor ko‘chishi xavfi mavjud» belgisi bilan cheklangan joylarga kirmaslikni so‘raymiz”, - deyiladi FVV axborotida.
Ma’lumot uchun, 28-29 yanvar kunlari O‘zbekiston hududiga Eron hududlaridan Kaspiy dengizi va Turkmaniston orqali nam va salqin havo massasi kirib kelishi kutilmoqda.
Harorat va atmosfera bosimining nisbatan gradiyentlari vujudga kelishi kutilmoqda. Shuning hisobiga Toshkent viloyati Bo‘stonliq tumanining ba’zi joylarida shamol tezligi 17-22 m/s gacha kuchayishi kutilmoqda, natijada mazkur hududda chang bo‘roni va g‘uborlar kuzatilishi mumkin.
28-29 yanvarda respublika hududlari bo‘yicha ba’zi joylarda yomg‘ir yog‘adi, ayrim joylarda qorga aylanishi mumkin. Tog‘oldi va tog‘li hududlarda yog‘ingarchilik (yomg‘ir, qor) bo‘ladi, ba’zi joylarda kuchli bo‘lishi mumkin.
