Turkiya prezidentining so‘zlariga ko‘ra, u va turmush o‘rtog‘i koronavirusning yangi variantini yengil o‘tkazmoqda va shifoxonaga yotish talab qilinmaydi.
Turkiya prezidenti Rajab Toyyib Erdo‘g‘an va uning turmush o‘rtog‘i koronavirusning omikron shtammini yuqtirib oldi. Bu haqda Turkiya rahbarining Telegram-kanalida ma’lum qilindi.
«Bugun dastlabki simptomlardan so‘ng rafiqam bilan COVID-19’ga test topshirdik. Test musbat chiqdi. Bu omikron ekanligi aniqlandi, — deb yozdi Erdo‘g‘an.
Turkiya prezidentining so‘zlariga ko‘ra, u va turmush o‘rtog‘i koronavirusning yangi variantini yengil o‘tkazmoqda va shifoxonaga yotish talab qilinmaydi.
«Biz ishimizni uydan davom ettiramiz. Duolaringizni kutamiz», — deya qo‘shimcha qilgan Erdo‘g‘an.
Ma’lumot uchun, 3 fevral kuni Erdo‘g‘an rafiqasi bilan Ukrainaga tashrif buyurgandi. Kiyevda u Ukraina prezidenti Vladimir Zelenskiy bilan uchrashdi, tomonlar o‘rtasida mudofaa sohasida kelishuv va memorandumlar imzolandi, shuningdek, Ukraina sharqidagi mojaro muhokama qilindi.