Bugun, soat 13:37da Toshkent metropolitenining Yunusobod yo‘nalishi Abdulla Qodiriy bekatiga yetib kelgan poyezd to‘xtab qoldi. Voqea joyida bo‘lgan Kun.uz muxbirining xabar berishicha, vagonlarda bo‘lgan taxminan 200 nafar yo‘lovchi bekatga tushirilgan.
Poyezdning to‘xtab qolish sabablari ma’lum emas. Taxminan yarim soatlardan keyin boshqa poyezd kelib yo‘lovchilarni olib ketgan.
Hozircha Toshkent metropoliteni holatga munosabat bildirmadi.
Bu – metro to‘xtab qolishi bilan bog‘liq 2022 yil fevral oyidagi kamida uchinchi hodisa. Avvalroq, 6 fevral kuni Mustaqillik maydoni bekatida harakat xavfsizligini ta’minlash maqsadida metro harakat tarkibining texnik moslamalari tekshirilgunga qadar to‘xtab turgan edi.
Shuningdek, 5 fevral oqshomida ham Toshkent metrosi poyezdi “Xalqlar do‘stligi” va “Milliy bog‘” bekatlari oralig‘ida to‘xtab qolgandi.
