14:30 / 06.03.2022
17416
“Kaptarlar otasi” – qushlarni sevuvchi nafaqaxo‘r

Buxorolik Ja’far Hojiyev – yetmishga yaqinlashib qolgan nafaqaxo‘r. U qushlarni o‘z yaqinlaridek parvarishlaydi. Ayniqsa, qo‘ldan don yeydigan, odamlardan cho‘chimaydigan kaptarlari mashhur. 

Ja’far Hojiyev Buxoro shahridagi “Chor Bakr” tarixiy-me’moriy majmuasida xo‘jalik ishlariga qarab yuradi, ham azon aytadi. Bu yerda ishlayotganiga 7 yildan oshgan. U qushlarni, jonivorlarni juda yaxshi ko‘radi. Hozir 15 turdan ortiq qushlari bor, ularni kuniga 2-3 mahaldan o‘zi ovqatlantiradi. Odamlar majmuaga, ayniqsa, qo‘lga o‘rgangan kaptarlarni ko‘rish uchun keladi.

Nafaqaxo‘r “Chor Bakr”ga qushlar 3 yil oldin olib kelinganini aytadi.

“Asli kuyovim qushlarga ishqiboz. U kishi bizga 20 dona kaptar keltirib bergandi. Shundan keyin bularni asta-sekin odamlarga qo‘ndiradigan darajada o‘rgatganman. O‘rgatish qiyin emas. Faqat 1-2 kun och qoldirib, o‘zingizga o‘rgatishingiz kerak”, – deydi u.

 Hozir bu yerda 50dan ziyod kaptar bor. Ularga don bermoqchi bo‘lsangiz, qo‘lingizga, boshingizga kelib qo‘nib oladi.

“Kaptarlar – tinchlik ramzi. Odamlarga xursandchilik ulashadi, odam beg‘am bo‘lib, hamma g‘amdan forig‘ bo‘lib ketadi. Qo‘lingizga ushlasangiz, badanlari issiq. O‘zingiz rohat qilasiz”, – deydi Ja’far aka.

Kaptarlardan tashqari majmuada olmaxon, tovus, quyon, ukki, yaponka tovug‘i, hind sesarkasi, kaklik va tuyaqushlar ham bor.

Zuhra Abduhalimova,
Kun.uz muxbiri

Mavzu
Hayotiy hikoyalar
Turfa taqdirlar va umr manzaralari
Barchasi
Top