Zomin tumani hududida KIA va Nexia 2 mashinalari o‘zaro to‘qnashuvi oqibatida 8 kishi halok bo‘lgani ma’lum bo‘ldi.
Jizzax viloyati IIB axborot xizmatining voqea yuzasidan bergan ma’lumotiga ko‘ra, hodisa 2022 yil 13 mart kuni soat 14:50 larda davlat ahamiyatiga ega bo‘lgan 4R-40 Dashtobod-Zomin-G‘allaorol avtomobil yo‘lining Zomin tumani Dashtobod shahri hududidan o‘tuvchi 2-kilometrida sodir bo‘lgan.
KIA rusumli mashina harakatlanib kelib Nexia 2 mashinasi bilan to‘qnashgan. Oqibatda 2 kishi voqea joyida, 6 kishi shifoxonaga yetkazilgandan so‘ng ko‘rsatilgan tibbiy muolajalarga qaramasdan vafot etgan.
KIA mashinasi haydovchisi I.A. tan jarohatlari bilan Zomin tumani tibbiyot birlashmasining jonlantirish bo‘limiga yotqizilgan.
Holat yuzasidan Jizzax viloyati IIB huzuridagi tergov boshqarmasi tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
