25 mart kuni Nur-Sulton shahrida maxsus xizmat xodimlari mamlakat prezidenti Qosim-Jo‘mart To‘qayevga suiqasd uyushtirishni rejalashtirgan «xorijiy razvedka agenti»ni qo‘lga olgan. Bu haqda mamlakat Milliy xavfsizlik qo‘mitasi (KNB) xabar bermoqda.
Milliy xavfsizlik qo‘mitasi qo‘lga olingan shaxsni «agent «A» deb atamoqda. U Qozog‘iston fuqarosi ekani tasdiqlangan.
Qo‘mita ma’lumotlariga ko‘ra, prezidentga suiqasd uyushtirishdan tashqari, u maxsus va huquq-tartibot organlar xodimlariga qarshi teraktlar uyushtirib, ayrim yuqori martabali davlat xizmatchilariga suiqasd qilishni rejalashtirgan.
Shuningdek, qo‘lga olingan shaxs Qozog‘istonda Rossiyaga qarshi tashviqot ishlarini olib borish vazifalarini ishlab chiqqani qayd etilgan.
Tintuv chog‘ida undan snayper miltig‘i, giyohvand moddalar va katta miqdordagi pul musodara qilingan.
Qayd etilishicha, hibsga olingan shaxs «xorijiy davlatning ko‘rsatmasi va manfaatlarini ko‘zlab amalga oshirgan» qo‘mita sanab o‘tgan qilmishlariga iqror bo‘lgan. Holat yuzasidan Jinoyat kodeksining 255-moddasi, 4-qismi (terrorizm akti) va 24-moddasi, 1-qismi (jinoyat va suiqasdga tayyorgarlik) bo‘yicha tergov harakatlari olib borilmoqda.
