Xabar qilinishicha, tomonlar Rossiya va Saudiya Arabistoni o‘rtasidagi o‘zaro manfaatli aloqalarni yanada rivojlantirishga kelishib olgan.
Rossiya prezidenti Vladimir Putin Saudiya Arabistoni valiahd shahzodasi Muhammad bin Salmon Al Saud bilan telefon orqali muloqot qildi. Bu haqda “Onado‘lu” agentligi Kreml matbuot xizmatiga tayanib xabar berdi.
Xabarda aytilishicha, tomonlar kun tartibidagi xalqaro masalalar, xususan, Ukraina hamda Yamandagi vaziyat bo‘yicha fikr almashdi.
"Jahon neft bozoridagi barqarorlikni ta’minlashga qaratilgan "OPeK plyus" shaklidagi hamkorlik ijobiy baholandi", - deyiladi xabarda.
Qo‘shimcha qilinishicha, muloqot davomida ikki tomonlama hamkorlikning dolzarb masalalari ko‘rib chiqildi.
“Tomonlar Rossiya va Saudiya Arabistoni o‘rtasidagi o‘zaro manfaatli aloqalarni yanada rivojlantirishga kelishib oldi”, deb ma’lum qilgan Kreml matbuot xizmati.