Do‘stlik tumanida XTB va MChJ rahbarlari o‘zaro til biriktirib, maktablar uchun 86 ta suv isitish qozonlarini qimmat narxlarda xarid qilgani aniqlangan.
Bosh prokuratura huzuridagi departamentning xabar berishicha, departamentning Do‘stlik tuman bo‘limi tomonidan tergovga qadar tekshiruv o‘tkazilgan. Tekshiruvda aniqlanishicha, Do‘stlik tumani Xalq ta’limi bo‘limi va “G.F.” MChJ mas’ul shaxslari o‘zaro til biriktirib, “Davlat xaridlari to‘g‘risida”gi Qonun talablarga zid ravishda, tumandagi maktablarga jami 86 dona suv isitish qozonlarini o‘rnatish bo‘yicha 762,2 million so‘mlik shartnoma tuzishgan.
So‘ng ushbu isitish qozonlarini 349,8 million so‘mga qimmat narxda xarid qilishgan hamda hisobotlarida 27,2 mln so‘mlik bajarilmagan ishlarni qo‘shib yozish orqali jami 377 million so‘m budjet mablag‘larini o‘zlashtirish yo‘li bilan talon-toroj qilishgan.
Qayd etilishicha, mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ish qo‘zg‘atilib, tergov harakatlari o‘tkazilmoqda.
