12:08 / 06.05.2022
37787
O‘zbekiston-Qirg‘iziston chegarasida uch nafar qirg‘izistonlik halok bo‘lgani aytilmoqda
Foto: Slutskiy Maksim / TASS

O‘zbekiston chegarachilari 5 may kuni Qirg‘izistonning uch nafar fuqarosiga qarshi qurol ishlatgan. Bu haqda 24.kg Qirg‘iziston Milliy xavfsizlik davlat qo‘mitasi chegara xizmatiga asoslanib xabar bermoqda.

«Hodisa Jalolobod viloyati, Ola-Buqa tumani, «Aktam» MFYning Doboqo‘rg‘on massivida sodir bo‘lgan. Uch nafar qirg‘izistonlik o‘qdan jarohat olgan, ular Ola-Buqa tumanidagi shifoxonaga yetkazilgan. Bemorlar o‘sha yerda hushlariga kelmay vafot etgan», — deyiladi xabarda.

Sodir bo‘lgan holat yuzasidan Qirg‘izistonning Ola-Buqa yo‘nalishi bo‘yicha chegara xizmati vakillari O‘zbekistonning Yangiqo‘rg‘on yo‘nalishi bo‘yicha chegara xizmati vakillari bilan uchrashuv o‘tkazgan. Tomonlar xizmat tekshiruvining yakuni bo‘yicha 6 may kuni yana qayta uchrashishga kelishib olgan. Sodir bo‘lgan holat yuzasidan tegishli organlar tomonidan tergov harakatlari boshlangan.

Avvalroq, aprel oyining boshlarida ham O‘zbekiston chegarachilari Qirg‘iziston hududidan noqonuniy yuk olib o‘tmoqchi bo‘lgan shaxslarga qarata o‘q uzgani haqida xabarlar tarqalgandi.

Top