Ozarboyjon mamlakatda ana shunday laboratoriyalar ishlashi to‘g‘risida aniq faktlar taqdim etilishini so‘ragan.
Ozarboyjon xavfsizlik xizmati mamlakat hududida uchinchi mamlakatlar tomonidan moliyalashtiriladigan biolaboratoriyalar yo‘qligini ma’lum qildi.
"Oxirgi vaqtda Rossiya Federatsiyasi vakillari tomonidan Ozarboyjon hududida go‘yoki uchinchi mamlakatlar tomonidan moliyalashtiriladigan biologik qurol sohasidagi tadqiqotlar bo‘yicha markazlar faoliyat ko‘rsatishi haqida bir necha marta fikr bildirildi. Shu munosabat bilan ma’lum qilamizki, respublika hududida bunday laboratoriyalar hech qachon faoliyat yuritmagan, Ozarboyjon yoki qo‘shni davlatlar fuqarolari salomatligiga zarar yetkazishi mumkin bo‘lgan hech qanday tadqiqotlar o‘tkazilmagan", - deyiladi xavfsizlik xizmati bayonotida.
Qo‘shimcha qilinishicha, mamlakatda ana shunday laboratoriyalar ishlashi to‘g‘risida aniq faktlar taqdim etilgan taqdirda, Ozarboyjon tomoni bu masalada hamkorlikka tayyor.
"Agarda Rossiya tomoni aniq faktlarni taqdim etsa, buni o‘rganishga tayyormiz", - deyilgan bayonotda.
27 aprel kuni Rossiya xavfsizlik kengashi kotibi Nikolay Patrushev AQSh va uning sheriklari ayrim sobiq ittifoq respublikalari hududlarida harbiy-biologik faoliyat bilan shug‘ullanuvchi biolaboratoriyalar tarmog‘ini yo‘lga qo‘yganini aytgandi.
