20:01 / 12.05.2022
5435
Biz yashil makon tarafdorimiz: UzAuto Arnasoy muhofaza hududini obodonlashtirmoqda

UzAuto atrof-muhitni asrab-avaylash zarurligini anglagan holda, 2021 yil dekabr oyining birinchi kunlarida Jizzax viloyatining cho‘l hududida tarkibiy tarmoq korxonalarining 1500 nafardan ortiq xodimlari bilan yangi yashil hudud barpo etdi. 103 gektar yer maydonda so‘nggi 5 oy ichida mahalliy iqlim sharoitiga mos keluvchi 60 mingdan ortiq daraxt ko‘chatlari – bular yapon saforasi, katalpa, pavlovniya, qarag‘ay, chinor va shu kabi manzarali tup daraxt ko‘chatlari ekildi.

Foto: UzAuto Motors

Mazkur loyiha Prezident Shavkat Mirziyoyev tashabbusi bilan respublika miqyosida o‘tkazilayotgan “Yashil makon” umummilliy loyihasi doirasida, shuningdek, Aydar-Arnasoy ko‘llar tizimining biologik resurslaridan oqilona foydalanishni ta’minlash va turizmni rivojlantirish davlat dasturi asosida amalga oshirilmoqda.

Shuni alohida ta’kidlash joizki, boshqa tashkilotlarning ko‘kalamzorlashtirish dasturini amalga oshirish uchun olib borilgan o‘rganish ishlari natijasida tarqoq tomorqalarda ekilgan ko‘chatlar katta ehtimol bilan qarovsiz qolib ketib, nobud bo‘lishi holatlari aniqlandi. Sug‘orish tizimi va doimiy parvarishlash bilan markazlashtirilgan bog‘ning barpo etilishi ekologiyani yaxshilash muammosining eng samarali va aniq yechimidir.

Aydar-Arnasoy tizimi ko‘llari qirg‘og‘ida joylashgan sun’iy o‘rmon parki dam olish kunlarida mahalliy aholi tabiat qo‘ynida hordiq oladigan jozibali turistik maskan bo‘ladi. Keyinchalik park hududi obodonlashtirilgan plyaj, sport maydonchalari va boshqa inshoot obektlari bilan to‘ldiriladi, bu esa, uni shubhasiz, faol dam olish uchun mashhur maskanga aylantirib, mintaqadagi ekologik vaziyatni yaxshilash imkonini beradi. Bundan tashqari, davlat-xususiy sheriklik doirasida kompleksning dam olish infratuzilmasini yaxshilash uchun qo‘shimcha sharoitlar yaratiladi.

Yaratilgan o‘rmon parki yaqin atrofdagi aholi punktlarida yashovchi aholi uchun doimiy ish o‘rinlari yaratish imkonini berdi. Kelgusida yosh daraxtlarni parvarish qilish maqsadida ko‘kalamzorlashtirish mutaxassislari tomonidan daraxtlarni sug‘orish, parvarishlash bo‘yicha muntazam ishlar olib borilmoqda.

Shuningdek, hududni 24 soatlik qo‘riqlash tizimi tashkil etilgan bo‘lib, parkni chorva hayvonlari va buzg‘unchilikdan himoya qiladi. Bundan tashqari, Jizzax viloyatining qurg‘oqchil zonasida oazis yaratadigan tomchilatib sug‘orish bo‘yicha jihozlash ishlari boshlandi. Natijada bugun, ko‘chatlar ekilganidan 5 oy o‘tgach, qishdan omon qolgani va tez orada Aydarko‘l yaqinida yam-yashil hudud barpo etilib, bu so‘lim go‘shalar yanada obod bo‘layotgani guvohi bo‘lmoqdamiz.

http://www.uzavtosanoat.uz

Reklama huquqi asosida

Top