09:08 / 06.07.2022
8331
Toshkentda Hyundai urib yuborgan piyodani Toyota bosib ketdi

Oqibatda, jabrlanuvchi og‘ir tan jarohatlari olib, voqea joyida vafot etgan.

Toshkent shahar IIBB axborot xizmatining xabar berishicha, 2022 yilning 5 iyul kuni soat taxminan 00:05 larda Yakkasaroy tumani, Shota Rustaveli ko‘chasida odam o‘limi bilan bog‘liq yo‘l-transport hodisasi sodir bo‘lgan.

Haydovchi Z.Yu. Hyundai mashinasida harakatlanib, belgilanmagan joydan yo‘lni kesib o‘tayotgan piyodani urib yuborgan. Piyoda yiqilgan va Hyundai bilan bir yo‘nalishda harakatlanib kelayotgan, haydovchi M.X. boshqaruvidagi Toyota mashinasi tagida qolib ketgan.

Oqibatda 1980 yilda tug‘ilgan V.S. og‘ir tan jarohatlari olib voqea joyida vafot etgan.

Qayd etilishicha, mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismida nazarda tutilgan jinoyat alomatlari bilan jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq, Toshkentda oraliq masofa saqlamagan Nexia-3 avtobusga urilishi oqibatida haydovchi vafot etgandi.

Top