Toshkent va Sirdaryoda farzandini sotgan ayollar ushlandi. Bu haqda Davlat xavfsizlik xizmati xabar bermoqda.
Qayd etilishicha, Davlat xavfsizlik xizmati va Ichki ishlar vazirligi xodimlari tomonidan Toshkent shahrida tezkor tadbir o‘tkazilgan.
Unda, poytaxtda yashovchi, 1994 yilda tug‘ilgan A.Sh. joriy yil 15 iyun kuni tug‘ilgan farzandini 35 ming AQSh dollariga sotib, kelgusida bolani qaytarib olish uchun da’vo qilmaslik bo‘yicha tilxat yozib bergan vaqtida ushlangan.
Shuningdek, uning mazkur noqonuniy harakatini amalga oshirishida yordam bergani uchun 200 AQSh dollari olgan tug‘uruqxona shifokori ham qo‘lga olindi.
Boshqa holatda esa, Davlat xavfsizlik xizmati Sirdaryo viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti hududiy boshqarmasi bilan hamkorlikda Boyovut tumanida tezkor tadbir o‘tkazildi.
Unda, 1993 yilda tug‘ilgan X.D. o‘zining 2018 yilda tug‘ilgan o‘g‘lini 16 ming AQSh dollariga sotgan vaqtida ashyoviy dalillar bilan ushlandi.
Hozirda har ikki holat yuzasidan jinoyat ishi qo‘zg‘atilib, tergov harakatlari olib borilmoqda, deyiladi xabarda.
