Gorbachyov tomonidan ilgari surilgan umumiy Yevropa uyi konsepsiyasi Rossiyaning Ukrainaga bostirib kirishidan keyin vayronaga aylandi, dedi Germaniya prezidenti.
Germaniya federal prezidenti Frank-Valter Shtaynmayyer Rossiyaning Ukrainaga bostirib kirishini temir parda qulagandan beri eng yomon inqiroz deb atadi va dunyoni yangi mojarolarga tayyorlanishga chaqirdi. «1989-90 yillardan beri hech bir inqiroz, birorta ham mojaro Rossiyaning Ukrainaga hujumi kabi jiddiy bo‘lmagan», dedi Shtaynmayyer 16 sentabr, juma kuni Berlinda G7 davlatlari («katta yettilik») parlamentlari rahbarlari bilan uchrashuvda.
«Biz hammamiz ishlagan narsa, jumladan, G7 doirasida ham yo‘q qilindi. Rossiya prezidenti Vladimir Putin so‘nggi muloqot ko‘priklarini, Yevropadagi tinchligimizning so‘nggi ustunlarini vayron qildi», - deya davom etdi Germaniya prezidenti.
Uning so‘zlariga ko‘ra, SSSR so‘nggi prezidenti Mixail Gorbachyov aytgan «umumiy Yevropa uyi xarobaga aylandi». «Hamkorlik xavfsizligi g‘oyasi tarixga kirdi. Yevropaning siyosiy xaritasi o‘zgardi va o‘zgaradi. Ko‘proq tashqi siyosat kerak, hamfikrlar o‘rtasida ko‘proq hamkorlik kerak», dedi Shtaynmayyer.
Qarama-qarshilik va raqobat kuchayib borayotgan bir paytda, «keyingi keskinlik xavfi juda katta», deya ogohlantirdi u va gap nafaqat Rossiyaga, balki «Xitoy bilan tobora murakkablashib borayotgan munosabatlarga» ham tegishli ekanligini ta’kidladi.
Prezident «hamma keyingi qarama-qarshiliklarga, yangi mojarolarga tayyor bo‘lishi kerak», deb ogohlantirdi. «Bu biz NATOda, G7’da o‘zimizni himoya qila olishimiz va iqtisodiy bosim o‘tkazishimiz kerak degan ma’noni anglatadi», - deya xulosa qildi u hamda inqiroz davrida siyosiy munozaralarni dalillar bilan emas, balki dezinformatsiya yoki hatto zo‘ravonlik, shu jumladan Rossiya yordami bilan o‘tkazishga intilayotgan populistik kuchlarga «qat’iy qarshilik ko‘rsatish»ga chaqirdi.
