07:25 / 20.09.2022
5422
Xitoy – Qirg‘iziston – O‘zbekiston – Afg‘oniston transport yo‘lagi bo‘ylab birinchi poyezd qatnovi yo‘lga qo‘yildi

«Qashqar – O‘sh – Andijon – G‘alaba – Hayraton» yangi tranzit yo‘nalishi bo‘yicha konteyner poyezdini sinovdan o‘tkazish boshlandi.

Foto: O‘zbekiston temir yo‘llari

«O‘zbekiston temir yo‘llari» aksiyadorlik jamiyati matbuot xizmati xabariga ko‘ra, ayni paytda 12 dona 40 futlik konteynerdan iborat birinchi poyezd O‘zbekiston hududi orqali o‘tmoqda.

Shuningdek, O‘zbekiston butun mamlakat bo‘ylab tashish uchun 70 foizlik chegirma bergani ma’lum bo‘ldi. Boshqa ishtirokchi davlatlar tomonidan 50 foizgacha bo‘lgan tarif imtiyozlari taqdim etildi.

Yuk tarkibiga oziq-ovqat mahsulotlari, maishiy texnika va xalq xo‘jaligi ehtiyojlari uchun mo‘ljallangan mahsulotlar kirdi. Tovarlar Xitoy tomoni tomonidan konteynerlarga shakllantirilgan va O‘sh vokzalida (Qirg‘iziston) konteynerlar O‘zbekistonga tegishli fitting platformalariga ortilgan. Poyezdning so‘nggi manziliga temiryo‘l orqali yetib kelishi ikki kundan keyin rejalashtirilgan.

«Xitoy – Qirg‘iziston – O‘zbekiston – Afg‘oniston» multimodal yo‘lagi bo‘ylab yuk tashish Qashqar (Xitoy) temiryo‘l vokzalidan O‘sh (Qirg‘iziston) temiryo‘l vokzaliga avtomobil orqali, so‘ngra O‘zbekiston orqali temiryo‘l orqali «Mozori Sharif» (Afg‘oniston) stansiyasigacha amalga oshiriladi. 

«O‘ztemiryo‘lkonteyner» AJ ushbu yo‘nalish bo‘yicha O‘zbekistonda bosh ekspeditor hisoblanadi. 

Top