AKT vaziri Sherzod Shermatov Kun.uz muxbirining raqamni saqlab qolgan holda mobil operatorni almashtirish imkoniyati qachon yuzaga kelishi borasidagi savoliga javob berdi. Vazir bu tizimda bir kishining raqamidan boshqa kishi telefon qilishi xavfi borligi uchun xavfsizlik masalasi ustida ishlanayotganini aytdi.
Xalqaro press klub sessiyasida AKT vaziri Sherzod Shermatov MNP tizimi borasidagi savolga javob berdi.
Uning aytishicha, tizim deyarli bitgan, faqat integratsiya masalalari qolgan.
“Bir operatorda ishlatayotgan raqamingizni boshqa operatorga o‘tkazish uchun texnologik yechim deyarli ishlab chiqilgan. Integratsiya va xavfsizlik masalalari qolgan. Ya’ni sizning nomingizdan boshqa odam kimgadir telefon qilishi kabi muhim xavfsizlik jihatlari bor. Boshqa davlat organlari bilan bu ishlarni oxiriga yetkazamiz”, – dedi vazir.
Shermatovning so‘zlariga ko‘ra, bu tizim ayti eksportini rivojlantirish, ayti xizmatlaridan to‘laqonli foydalanish bo‘yicha huquqlari qiynaydigan masala emas.
U shuningdek, “mobil qullik” atamasi unchalik to‘g‘ri emasligini ta’kidladi.
“Dunyoda ham MNP tizimi bor, ammo u rezonans bo‘lib qanaqadir ayti eksporti yoki ayti xabiga ta’sir qilgani yo‘q. Ertaga juda ko‘p odam raqam almashtirishi qiyin. Chunki iste’molchilar operatorlar o‘rtasida juda katta farq bo‘lib ketsa yoki biror kompaniya yopilib ketsa, raqamini saqlab qolish maqsadida bu tizimdan foydalanishi mumkin. Ishlar oxiriga yetgandan keyin xabar beramiz. Aytganimdek, tegishli organlar bilan kelishadigan joylarimiz bor”, – dedi vazir.
Avvalroq, Kun.uz “mobil qullik”ka hamon barham berilmayotgani, bu boradagi va’dalar ortga surilib kelayotgani haqida yozgandi.
Ma’lumot uchun, MNP tizimi shunday tizimki, bu O‘zbekistonning istalgan uyali aloqa kompaniyasi abonenti o‘zining telefon raqamini saqlab qolgan holda kompaniyani o‘zgartirishi mumkin bo‘lishini anglatadi.
