01:01 / 10.01.2023
6084
Eron Rossiyani dron bilan ta’minlash orqali urush jinoyatlariga sherik bo‘lishi mumkin - Oq uy

AQSh Tehronning harakatlarini shu pozitsiyadan ko‘rib chiqmoqda.

Foto: Reuters

Eron Rossiyaga kamikadze dronlarini yetkazib bermoqda, ulardan Ukrainaning energetika va fuqarolik infratuzilmasiga hujum qilishda foydalanilmoqda. Tinch aholiga qarshi bunday harakatlar urush jinoyatlari hisoblanadi. Tehron esa bunga sherik bo‘lishi mumkin.

Oq uyning milliy xavfsizlik bo‘yicha maslahatchisi Jyeyk Sallivanning bu haqda jurnalistlarga bergan izohini Sky News keltirdi.

«Eron qurollari Ukrainada tinch aholini o‘ldirish va shaharlarni sovuq va zulmatga cho‘mdirish uchun qo‘llanmoqda, bu esa, bizning nuqtai nazarimizdan, Eronni keng ko‘lamli harbiy jinoyatlarga yordam berishi mumkin bo‘lgan vaziyatga tushirib qo‘yadi», dedi u.

Rossiya Ukrainaga qarshi urushda Eronning «Shohid» dronlaridan «Geran-2» nomi ostida muntazam foydalanib kelmoqda. O‘z navbatida Tehron Rossiyaga harbiy yordam berayotganini rad qilib kelyapti.

6 yanvar kuni AQSh kamikadze dronlarini ishlab chiqaruvchi Eronning Qods Aviation Industries kompaniyasi rahbariyati va boshqaruv xodimlariga qarshi sanksiyalar joriy qildi.

Mavzu
Rossiya-Ukraina urushi
2022 yil 22 fevral kuni Rossiya Ukraina chegarasidan o‘tib, qo‘shni mamlakatga bostirib kirdi. Ukraina armiyasi jang taklif qildi.
Barchasi
Top