Rossiyaning USM Holdings Limited kompaniyasi egasi, asli kelib chiqishi o‘zbekistonlik bo‘lgan rossiyalik milliarder Alisher Usmonovning boyligi yil boshidan buyon 1,26 mlrd dollarga ko‘payib, 19,7 mlrd dollarga yetdi.
Milliarder Alisher Usmonovning boyligi joriy yil boshidan beri 1,26 milliard dollarga ko‘payib, 19,7 milliard dollarga yetgan. Usmonov Bloomberg Billionaires Index ro‘yxatida 81-o‘rinda qayd qilindi.
Louis Vuitton brendi egasi Bernar Arno reytingda birinchi o‘rinni egallab turibdi. Bloomberg uning boyligini 192,9 mlrd dollarga baholadi. Ilon Mask 169 mlrd dollar bilan ikkinchi, Jyeff Bezos 129 mlrd bilan uchinchi o‘rinda qayd etilgan.
Avvalroq, Alisher Usmonovning huquqshunoslari nemis matbuotidagi o‘ziga nisbatan ayblovlar ilgari surilgan maqolalar bo‘yicha raddiya berilishiga erishgani xabar qilingandi. Bundan tashqari, ular Myunxen prokuraturasi o‘z veb-saytidan Usmonovga nisbatan ishonchsiz ayblovlar tarqatilgan press-relizni olib tashlashiga ham muvaffaq bo‘ldi.
Shuningdek, Britaniyaning Yachting Pages nashri ham Alisher Usmonov haqidagi maqola uchun uzr so‘ragani ma’lum qilingandi.
