12:03 / 02.02.2023
27812

Shimoliy So‘x yerosti gaz saqlash inshooti qayta ishga tushirilishi mumkin

Bir vaqtlar yopilgan, hajmi 2,5−3 mlrd kub metr bo‘lgan Shimoliy So‘x yerosti gaz saqlash inshooti yana qayta ishga tushishi ma’lum qilindi. Inshootning asosiy gaz saqlash qismi Qirg‘izistonda, kompressorlar esa O‘zbekiston hududida. Inshootdan umumiy foydalanish borasida muzokaralar olib boriladi.

Foto: Prezident matbuot xizmati

Shimoliy So‘x yerosti gaz saqlash inshooti yana qayta ishga tushirilishi mumkin. Bu haqda Prezident Shavkat Mirziyoyev kecha, 1 fevral kuni Andijon shahrida o‘tgan yig‘ilishda ma’lum qilgan.

«Afsuski o‘z vaqtida So‘xdagi yerosti gaz saqlash inshooti ayrim sabablar bilan yopib qo‘yilgan edi. Qirg‘izistondagi davlat tashrifi chog‘ida Sadir Japarov bilan bu masalada ham kelishib oldik. Yaqinda energetika vazirimiz Qirg‘izistonga borib, texnik tomonlarini kelishib keladi», — dedi prezident.

O‘zA muxbiri mazkur masala yuzasidan energetika vaziri Jo‘rabek Mirzamahmudovdan izoh oldi.

«Shimoliy So‘x yerosti gaz saqlash inshootining hajmi taxminan 2,5-3 mlrd kub metr atrofida. Shundan 1,3 mlrd kub metr gazdan foydalanish mumkin, qolgani bufer zonada turadi. Bu degani qish mavsumida vodiyni har kuni 13 mln kub metr gaz bilan ta’minlash imkoniyatimiz bo‘ladi.

Mazkur inshootning asosiy gaz saqlash qismi Qirg‘iziston hududida joylashgan, kompressorlar esa O‘zbekiston hududida. Shu sababli inshootdan umumiy foydalanish borasida muzokaralar olib boriladi. Eng avvalo ishchi guruh barcha texnik va iqtisodiy tomonlarini batafsil o‘rganib chiqadi. Chunki inshootdan ancha yillardan buyon foydalanilmagan, hozirgi holatini yaxshilab o‘rganib chiqishimiz kerak. Shundan so‘ng shartlar kelishib olinadi. Balki bu ijara huquqi asosida bo‘lar, lekin hozircha biror fikr aytishga erta», — dedi energetika vaziri.

Mavzuga oid
Top