Видео: Ислом Каримов ҳаётидан баъзи ноёб кадрлар

30 январь куни Ўзбекистоннинг биринчи президенти, мамлакатни 25 йил бошқарган Ислом Каримов таваллудига 82 йил тўлди.

Биз Каримов фонди тақдим этган баъзи видеолавҳалар асносида биринчи президентнинг ҳаёт йўлига қисқача қайта назар ташлаб ўтишга қарор қилдик.

Каримов 1938 йил 30 январда Самарқанд шаҳрида туғилган. Ўрта Осиё Политехника ва Тошкент Халқ хўжалиги институтларини тамомлаган.

Меҳнат фаолиятини 1960 йилда Тошкент қишлоқ хўжалик машинасозлиги заводида бошлаган. 1961-1966 йилларда В.П.Чкалов номидаги Тошкент Авиация ишлаб чиқариш бирлашмасида муҳандис, етакчи муҳандис-конструктор бўлиб ишлади.

Турли йилларда Ўзбекистон ССР Молия министри, Министлар совети раиси ўринбосари, Давлат план комитети раиси, Қашқадарё вилоят компартияси биринчи котиби лавозимларида ишлаган. 1989 йил июн ойида Ўзбекистон Компартияси Марказий комитетининг биринчи котиби этиб тайинланди.

Совет иттифоқи давлатлари ичида биринчи бўлиб Ўзбекистонда президентлик лавозими жорий этилди. 1990 йил 24 мартда Олий Кенгаш сессиясида Каримов Ўзбекистон ССР президенти этиб сайланди.

1990 йил 20 июнда Ўзбекистон суверенитети тўғрисида декларация қабул қилинди. 1991 йил 31 август куни Ислом Каримов тарихий воқеа – Ўзбекистон Республикасининг давлат мустақиллигини эълон қилди. 1991 йил 29 декабрдаги сайловда Ислом Aбдуғаниевич мустақил Ўзбекистоннинг илк президенти этиб сайланди.

Каримов Ўзбекистонни 25 йил давомида бошқарди. Шу давр мобайнида 4 марта (1991, 2000, 2007, 2015) давлат раҳбари этиб сайланди. 2 маротаба (1995, 2002) умумхалқ референдуми орқали президентлик ваколати муддати узайтирилди.

Ислом Aбдуғаниевич 2016 йил 2 сентябр санасида, 78 ёшида инсульт оқибатида вафот этди.

Ҳозирда биринчи давлат раҳбарининг рафиқаси Татьяна Каримова ва қизи Лола Каримова-Тиллаева унинг хотирасини абадийлаштириш билан шуғулланмоқда.

Шу мақсадда Каримов фонди ташкил этилган бўлиб, фонд ёшларни қўллаб-қувватлаш, Ўзбекистон тарихий меросини сақлаб қолиш билан шуғулланади.

Ислом Каримов ҳаёти давомида истиқомат қилган Оқсарой биноси ҳозирда мемориал мажмуага айлантирилган.