«Асака» банк бош офисида «Жонажон Ўзбекистоним, мангу бўл омон!» шиори остида банк ходимлари фарзандлари учун байрам тадбири уюштирилди

Фото: «Асака» банк

Энг улуғ, энг азиз айём – Давлатимиз мустақиллигининг 28 йиллигига бағишлаб «Асака» банк бош офисида ўтказилган байрам тадбири ёшларни она Ватанга садоқат, меҳр-оқибат руҳида тарбиялаш, мустақиллик тўғрисида кенгроқ тасаввурга эга бўлишини таъминлаш, билим ва кўникмаларини янада ошириш ва китобхонликка чорлаш мақсадида ташкил этилди.

Байрамда эртак қаҳрамонларининг саҳнага чиқиши, «Ким чаққон-у, ким эпчил» спорт ўйинлари, «Ватаним – ранглар жилосида» расмлар танлови, мантиқий фикрлаш каби бир-биридан қизиқарли дастурлар болажонлар қалбига олам-олам қувонч улашди.

– Зумрадой ва Билмасвой билан рақсга тушдик, – дейди тадбирнинг ёш иштирокчиларидан бири Ибодулло Қориев. – Ўртоқларим билан югуриш, сакраш ва яна бошқа шартлар бўйича мусобақалашдик. Дадамнинг ишхонаси ҳаммамизга совға берди. Жудаям хурсанд бўлдим.