Беларусь Миллий олимпия қўмитаси раҳбари, мамлакат президенти Александр Лукашенко Қишки олимпиада ўйинларида иштирок этаётган фристайлчи Антон Кушнирга ҳакамлар қўйган баҳодан норози бўлиб Халқаро олимпия қўмитаси (ХОК) президенти Томас Бах номига шикоят хати ёзди. Бу ҳақда ТАСС нашри хабар тарқатди.
«Федерациямиз бу ҳолатдан кейин Пёнгчангдаги халқаро чанғи спорт федерацияси билан гаплашиб олиш мақсадида ҳакамларнинг қарори юзасидан протест ёзди.
Жавоб қандай бўлиши аниқ эди. Мен тунда Ташқи ишлар вазирлигини оёққа турғазиб, Жанубий Кореядаги элчихона орқали фаол ишлатишимга тўғри келди. Зудлик билан Бах номига ҳукумат миқёсидаги шикоят хатини жўнатдик. Унга барчасини айтдик, ўйлайманки, буни анча юмшоқ кўринишда билдирдик.
Биз буни очиқладик. Яшириш керак эмас. Спорт жамоатчилигига бу огоҳлантирув сигнали.
Лекин мен бизнинг фойдамизга қарор чиқарилади, деб ўйламайман. Ҳаракатимиз зое кетса, кейин нима қиламиз...
Мен 20 йилдан буён Миллий олимпия қўмитамизга президент бўлиб келаман, мен ҳеч қачон уларнинг сессияларида иштирок этмаганман, лекин энди боришим керакка ўхшайди. Бу сиёсийлашган ташкилотни жойидан қўзғатиш керак. Улар ҳаддан ошибди. Улар кимга медаль беришни олдиндан белгилаб олишади: ким сиёсий томондан кучли бўлса, медаль ўшанга. Буни бас қилмоқ керак!», — дея қайд этиб ўтган Лукашенко.
Сочи олимпиадаси чемпиони Кушнир чанғи акробатикаси финалига йўл ола билмаганди. У швейцариялик спортчидан 0,45 балл ортда қолиб, саралашдан ўта олмай қолган. Бир неча спорт мутахассисларининг айтишича, Кушнир кўпроқ балл олишга муносиб ҳаракатларни амалга оширган. Аммо ҳакамлардан бири Швейцариядан бўлган ва айнан у Кушнирга паст баҳо қўйганди.
