АҚШ президентлиги учун Демократик партия номзоди Ҳиллари Клинтон ишонч билан республикачилар номзоди Дональд Трампни ортда қолдирмоқда, бироқ унинг машҳурлиги тобора пасайиб бораяпти, дейилади The Wall Street Journal ва NBC News телеканали ўтказган ижтимоий сўров натижасига оид ҳисоботда.
Клинтон саломатлиги билан боғлиқ муаммолар ва Дональд Трамп сайловчилари хусусида аччиқ сўзларига қарамай, устунликни сақлаб қола олган. Айни вақтда, унинг учун сайловчиларнинг 43 фоизи овоз беришлари мумкин. Трамп эса 37 фоизлик кўрсаткичга эгалик қилиб турибди.
Аввалги ижтимоий сўров натижаларига кўра, Клинтонни америкаликларнинг 48 фоизи, Трампни эса 42 фоизи қўллаб-қувватлашини билдирган эди.
Бунда, сайловчиларнинг 12 фоизи президентлик пойгаси аутсайдерлари: либертариан Гэри Жонсон (9 фоиз) ва Яшиллар партияси вакили Жилл Стайн (3 фоиз) номзодини маъқул кўришмоқда. Сўралганларнинг яна саккиз фоизи ҳозирча бир тўхтамга келмаган.
АҚШ президентлик сайлови 8 ноябрда бўлиб ўтади.
