Франция пойтахти Париж шаҳридаги Эйфель минораси ўқ ўтказмайдиган 2,5 метрли ойнадан бўлган девор билан ҳимояланади. Бу хавфсизлик мақсадида амалга оширилади, деб хабар бермоқда "Паризьен" газетаси.
Нашр маълумотига кўра, ойна жорий куздаёқ ўрнатилади. Унга тахминан 20 миллион евро миқдорида маблағ сарфланиши кутилмоқда.
Эйфель минорасига хизмат кўрсатиш жамияти раҳбари Бернар Годьернинг аниқлик киритишича, ўқ ўтказмайдиган тўсиқ Эйфель минораси атрофидаги боғларнинг кўп қисмини ҳам ўз ичига қамраб олади. Париж шаҳри еттинчи округи ҳокими Рашида Дати маъмурияти бу хабарга ҳозирча изоҳ бермади.
