Велоспорт бўйича беш карра олимпия чемпиони британиялик Брэдли Уиггинс The Jump шоу-дастурини тасвирга олиш жараёнида оёғини синдириб олди, деб хабар берди BBC News.
«Мен уч-олти ҳафта давомида дам олишга мажбурман. Яхши янгилик шундан иборатки, жарроҳлик амалиёти ўтказилмади. Қўрқинчли ҳеч нарса бўлгани йўқ, бироқ жароҳат менга шоуда яна иштирок этишга имкон бермайди», - дея маълум қилди спорчи.
Маълумот учун, The Jump – Британия телевидениесидаги шоу бўлиб, унинг доирасида машҳур кишилар ўз кучларини турли қишки спорт турларида синаб кўришади. Уиггинс тоғ чанғичи бўйича машқларда жароҳат олди. Ўтган йилнинг февралида эса британиялик гимнастикачи, уч карра жаҳон чемпиони Элизабет Твиддл шоуни тасвирга олиш жараёнида жароҳат олганди. У бўйнидан лат еган бўлиб, жарроҳлик амалиётидан ўтказилди.
Машҳур велоспортчи Уиггинс 2016 йилнинг декабрида профессионал фаолиятини якунлаши ҳақида эълон қилди. У трекдаги велопойгалар бўйича тўртта ва шосседаги пойгаларда битта олимпия олтин медалини қўлга киритган.
