Аввал хабар берилганидек, Ўзбекистон Республикаси Ички ишлар вазирлигида Жисмоний-юридик шахсларнинг мурожаатлари билан ишлаш ва иш юритиш бошқармаси ташкил этилди.
Мазкур бошқарма таркибида Мурожаатларни телефон орқали қабул қилиш маркази фаолияти ҳам йўлга қўйилади.
Бундан ташқари, Ўзбекистон Республикаси Ички ишлар вазири Абдусалом Азизовнинг Халқаро пресс клубда ташкил этилган матбуот брифингида маълум қилишича, Ички ишлар вазирининг 1102 рақамли ишонч телефони ҳам 1 майдан синов тариқасида иш бошлаган.
Вазирнинг алоҳида уқдиришича, мазкур ишонч телефони орқали фуқароларнинг барча турдаги мурожаатлари эмас, балки айнан ички ишлар органлари ходимларининг иши ёки фаолиятидан қониқиш ҳосил қилинмаганга доир арзлар қабул қилинади.
Ички ишлар вазирлиги ходимининг аниқлик киритишича, бундан аввал вазирликдаги турли бошқармалар қошидаги 173та ишонч телефонлари (фуқароларнинг ички ишлар идоралари ходимлари устидан мурожаатларини қабул қилган) бирлаштирилиб, Call-марказ ташкил этилган.
