Хитой жанубидаги Гуандун вилоятида шифокорлар ўткир заҳарланишга учраган беморнинг ҳаётини сақлаб қолиш учун атропин дори воситаси солинган 8 мингта ампулани қўлларида очиб чиқишларига тўғри келди.
18 май куни Шаньтоу шаҳридаги университет тиббиёт коллежи шифохонасига инсектицид (зараркунанда ҳашаротларни йўқ қилишга мўлжалланган кимёвий восита) қабул қилиши оқибатида комага тушган бемор келтирилган.
Беморнинг ҳаётини қутқариш учун атропин керак бўлган, бироқ у шифохонада жуда кичик ўлчамдаги ампулаларда сақланган. Натижада 8 нафар шифокор керакли миқдордаги атропинни олиш учун 8 мингта ампулани 12 соат давомида қўллари билан очиб чиқишларига тўғри келган. Бироқ бунча ампуладаги дори ҳам етмаган ва шифокорлар дорининг қолган миқдорини олиш учун бошқа шифохонага мурожаат қилишларига тўғри келган, деб хабар бермоқда China Daily нашри.
Шифокорлар кўп соат давомида тўхтамасдан ампулаларни синдириб очишларига тўғри келганлари сабаб уларнинг баъзилари қўлларини шикастлаб олганлар, баъзиларининг эса ҳатто бармоқлари кесилиб кетган.
