Forbes нашри Германия канцлери Ангела Меркелни дунёнинг энг нуфузли аёли деб топди. Меркель жорий йилда Германияда ўтган сайловлар натижаларига кўра ўз лавозимига қайта сайланган.
Меркель 7 йилдан бери шу номга лойиқ деб топиб келинмоқда.
Энг нуфузли аёллар рейтингининг 2-поғонасини Британия бош вазири Тереза Мэй, 3-поғонасини эса Miсrosoft корпорацияси асосчиси Билл Гейстнинг рафиқаси, тадбиркор ва саховатпеша Мелинда Гейтс эгаллаган.
Мэй сиёсатдаги муваффақиятлари ва Brexit жараёнидан ўтгани сабабли бу рейтингга биринчи марта киритилди. Мелинда Гейтс турмуш ўртоғи билан биргаликда грантлар учун 40 млрд доллар сарфлашган ва 100 дан кўпроқ давлатлардаги ташкилотларни қўллаб-қувватлаб келадилар.
Рейтингнинг етакчи ўнталигидан шунингдек Facebook операцион директори Шерил Сэндберг (4-поғона), General Motors бош директори Мэри Барра (5), YouTube бош директори Сьюзен Войжитски (6), Fidelity Investments президенти Эбигейл Жонсон (7), ХВЖ тақсимловчи директори Кристин Лагард (8), Santander гуруҳи директорлар кенгаши раиси Ана Патрисия Ботин (9) ва IBM бош директори Жинни Рометти ҳам ўрин олган.
Эътиборлиси, АҚШнинг собиқ давлат котиби ва 2016 йилги президентлик сайловларида иштирок этган Ҳиллари Клинтон анча паст ўринни – 67-поғонани эгаллаган, ваҳоланки у ўтган йилги рейтингда 2-поғонага лойиқ деб топилганди.
Рейтингдан 2 нафар россиялик – Россия Марказий банки раиси Эльвира Нибиуллина (49-ўрин) ҳамда "Россия сегодня" ва RT ахборот агентлигининг бош муҳаррири Маргарита Симоньян (52-ўрин) ҳам жой олган.
Шунингдек, Буюк Британия қироличаси Елизавета II 26-поғонани, АҚШ президенти Дональд Трампнинг қизи ва маслаҳатчиси Иванка Трамп 19-поғонани, америкалик машҳур телебошловчи Опра Уинфри 21-ўринни эгаллаган.
