Чеченистон раҳбари Рамзон Қодиров ўзининг Instagram саҳифасида Ўзбекистон Президенти Шавкат Мирзиёевнинг куёви билан бирга акс этган суратини жойлаб, у ҳақида илиқ фикрлар билдирди.
"Азиз дўстлар! Чечен масалига кўра, бир донишманд ўз ўғилларига турли ўлкаларда қалъалар бунёд этишни васият қилади. Улар гап айнан ҳимояловчи иншоотлар ҳақида кетаяпти, деб ўйлашади. Аслида эса, отаси ўғилларига ҳар қандай қалъадан-да яхшироқ ҳисобланган ишончли дўстлар орттириш ҳақида гапирган экан. Менинг азиз ОТАМ, ЧР Биринчи Президенти, Россия қаҳрамони Аҳмад Ҳожи Қодиров мусулмонларни қариндошчилик ва дўстона алоқаларни мустаҳкамлашга ундовчи ва шу билан бирга, бундай алоқаларнинг узилишини қораловчи ҳадисларни кўп айтиб берарди. Ўзбекистонда бўлганимда шуларни эсладим, у ерда Аллоҳнинг иродаси билан муносиб инсонлар билан танишдим.
Албатта, Ойбек Турсуновдек ажойиб дўст ва БИРОДАРни топганим мен учун катта шараф. Яхши билимга эга, тартиб-интизомли, хушмуомала ва камтар инсон. Менга унинг давлат кўламида кенг фикрлаши, ўз Ватани - Ўзбекистон келажагига бўлган қатъий ишончи ёқди! Ойбек Турсуновдек йигитлар бор экан, Ўзбекистон Президенти Шавкат Мирзиёев ўз жамоасига ажойиб ҳамфикрларини тўплаганига ишончим комил.
Қадрли БИРОДАР, менинг уйим эшиклари сен учун доим очиқ! Албатта, биз бу ерда Самарқанд ва Бухородагидек мазали палов тайёрлай олмасмиз, лекин Ўзбекистонда йўқ чечен таомлари билан меҳмон қиламиз! Шу билан бирга, айтмоқчи бўлганим - Чеченистонда ҳам сенинг қўрғонинг бор!", - деб ёзади Қодиров.
