Мисрда теракт қурбонлари хотирасига уч кунлик мотам эълон қилинди

Миср ҳукумати 24 ноябрда Синай ярим оролида содир этилган теракт қурбонлари хотирасига 3 кунлик миллий мотам эълон қилди. Бу ҳақда On TV телеканали хабар бермоқда.

Теракт Шимолий Синай вилоятининг пойтахти Ал-Аришдан ғарбда жойлашган Ар-Рауд аҳоли пунктидаги масжидда жума намози вақтида содир этилди. Террорчилар масжидни 4 та йўлтанламасда қуршаб олиб, одамлар орасида портловчи қурилмани портлатиб, сўнгра уларни ўққа тута бошлашган. 

Охирги маълумотларга кўра, теракт оқибатида 85 киши ҳалок бўлган, 75 га яқин киши яраланган.

Кўпчилик ҳалок бўлганлар ва жароҳатланганлар оддий фуқаролар бўлиб, улар орасида болалар ҳам бор. Мисрда ҳаракат қилувчи бирорта экстремистик гуруҳ ҳозирча теракт учун жавобгарликни ўз зиммасига олмаган.