Ўзбекистон президенти Шавкат Мирзиёев Қирғизистон президенти Сооронбай Жээнбеков билан учрашув чоғида транспорт қатнови борасида келишиб олганликларини маълум қилди.
Унинг таъкидлашича, томонлар автобус йўналишларини очиш, нафақат Бишкек-Тошкент йўналиши бўйича авиарейсларни, балки Тошкент-Ўш йўналишида ҳам парвозларни йўлга қўйиш бўйича келишиб олдилар. «Жуда катта эҳтиёж бор. Биз Бишкек ва Тошкент ўртасида авиарейслар қатновини икки баробарга кўпайтиришни истаймиз. Бунга эҳтиёж бор», - деди Мирзиёев.
Ўзбекистон президенти темир йўл йўналиши бўйича келишувлар мавжудлигини ҳам хабар қилди. «Қирғизистонда Иссиқ-Кўл ноёб кўли бор. Халқимиз биз авиарейсни йўлга қўйишимизни хоҳлади, аммо биз шунга келишиб олдикки, Иссиқ-Кўлга қадар темир йўл йўналишини ҳам очамиз. Одамлар қўшниларда шундай ажойиб жой бор бўлса, нега улар узоққа боришлари керак. Транспорт-логистик масалада биз катта ютуқларга эришдик», - деди Шавкат Мирзиёев.
Мирзиёевнинг, шунингдек, таъкидлашича, «биз чегара масалалари бўйича ҳам олдинга силжидик». Унинг сўзларига кўра, президентларнинг хоҳиш-иродаси керак бўладиган масалалар ҳам бор. «Менимча, у бизда бор. Биз бир йил давомида чегаранинг 85 фоизини ҳужжатларга туширдик, тасаввур қиляпсизми. Бу фақат йўлнинг бошидир. Аста-секин ҳужжатларга туширамиз», - деди у.
Сооронбай Жээнбеков 13 декабрь куни Тошкентга келди. Бу унинг президент сифатидаги биринчи расмий ташрифидир. Жээнбеков пойтахтдаги Мустақиллик майдонига ташриф буюриб, Мустақиллик ва эзгулик монументи пойига гул қўйди. У шунингдек биринчи президент Ислом Каримов номидаги ёдгорлик мажмуасини ҳам зиёрат қилди ва унинг ҳайкали пойига гул қўйди.
