Россия Марказий сайлов комиссияси 2018 йилги президентлик сайловлари учун номзод Владимир Путинни мустақил равишда илгари суриш учун ташкил этилган сайловчилар гуруҳини, шунингдек унинг ваколатли вакилларини рўйхатдан ўтказди. Бу ҳақда «Интерфакс» хабар бермоқда.
Россия МСКнинг алоҳида қарори билан Путинга сайлов жамғармасини шакллантириш ва сайловолди ташвиқотини бошлаш учун махсус сайлов ҳисоб рақамини очишга рухсат берилган.
Комиссиянинг барча аъзолари томонидан бир овоздан қабул қилинган қарорларга кўра, МСК Путиннинг ташаббус гуруҳини ва унинг ваколатли вакилларини – беш кишини рўйхатдан ўтказди. Рўйхатдан Оксана Дружинина, Алексей Ермаков, Сергей Кабишев, Андрей Тихомиров ва Надежда Чучелина жой олди. Шунингдек, МСК Путиннинг молиявий масалалар бўйича ваколатли вакилини ҳам рўйхатдан ўтказди, бу лавозимни Наталья Орлова эгаллади.
Эслатиб ўтамиз, аввалроқ Путин сайловларда иштирок этиш учун ҳужжатларини топширгани хабар берилганди.
