Sony компанияси парвоз ва инқирозларга тўла бой тарихга эга. Бироқ қандай бўлмасин, унинг маиший электроника, турли-туман гаджетлар, робототехника ва ўйин саноати ривожига қўшган ҳиссасини тан олмай илож йўқ. Бугунга келиб бу япон компаниясининг муҳандислари томонидан лойиҳалаштирилган PlayStation туркумидаги ўйин консоллари ёки ажойиб видеокамера ва фотоаппаратлари ҳақида эшитмаган одам кам бўлса керак.
Кадзуо Хираи компания учун оғир вақтда, даромад нолга тенг бўлаётган, компания акциялари эса шиддат билан пасайиб кетаётган бир пайтда Sony бошқаруви тепасига келди. 2012 йилдан у мисли кўрилмаган ишларни олиб борди ва Sony'нинг аввалги нуфузини тиклади. Бироқ шунга қарамай, бугун маълум қилинишича, жорий йилнинг апрель ойида у президент лавозимини тарк этишни режалаштирмоқда.
Кадзуо Хираи 1984 йилда CBS Sony Records компаниясига ишга жойлашади. Ўшанда у Японияда хориж мусиқаси маркетинги билан шуғулланган, сўнгра Sony'нинг халқаро ҳамкорлик бўлими бошлиғи лавозимига кўтарилган. Бунда Кадзуонинг отаси банкир бўлгани ва ўғлини доим АҚШга олиб боргани ҳамда унинг инглиззабон болалар орасида ўқигани ва тил ўрганиш билан бир қаторда Ғарб маданиятини ўзлаштиргани жуда катта ёрдам берди. Кейинчалик Хираи компаниянинг Америкадаги бўлимига кўчирилди ва энди унинг вазифаси америкаликлар орасида япон мусиқасини оммалаштиришдан иборат эди.
1995 йилда Кадзуо Хираи Sony Computer Entertainment America'га кўчирилди — бу ўйин консолларини тарқатиш ва қўллаб-қувватлаш учун масъул бўлим. Тўрт йилдан кейин у компаниянинг операцион директори сифатида фаолият юритди, 2003 йилда эса унинг бош директори бўлди. Шу инсоннинг моҳирона бошқаруви остида фойдаланувчилар орасида жуда машҳур бўлган PlayStation 2 консоли ишлаб чиқарилди. Ишонч билан таъкидлаш мумкинки, айнан Хираининг қобилияти сабаб PlayStation туркумига жавобгар бўлим бугунги кунда ҳам самарали фаолият юритиб, компанияга салмоқли даромад келтирмоқда.
Собиқ президент Говард Стрингернинг ўрнига келган Кадзуо Хираи Sony'ни сақлаб қолиш учун кескин чоралар кўришга қарор қилди. У компаниянинг қатор кўчмас мулкини сотишига, фойда келтирмаётган бир неча студия ва бўлимларини ёпишига тўғри келди. Бир муддат у ҳатто раҳбариятнинг иш ҳақини икки бараварга кесди, шу жумладан ўзининг маошини ҳам. Бироқ охир-оқибат унинг қарорлари ўз натижасини кўрсатди ва Sony секин-асталик билан, лекин тўғри йўлдан бориб "жарлик"дан чиқди.
"Sony'нинг келажакка дадил қадам ташлаши, шунингдек ҳаётимдаги янги бобни бошлашим учун янги корпоратив режа ижросига киришилаётган бугунги кун - етакчиликни янги раҳбариятга топширишнинг айни вақти, деб ҳисоблайман", - деди Кадзуо Хираи ўзининг расмий баёнотида.
Кадзуо Хираи 2018 йилнинг 1 апрелида компания президенти лавозимини тарк этиши ҳақида эълон қилди. Унинг ўрнини 2013 йилдан буён компаниянинг бош молиявий директори лавозимини эгаллаб келган Кеничиро Ёсида эгаллайди. Хираи бир неча йил давомида Ёсида билан елкама-елка ишлади, шу боис ўз компанияси бошқарувини айнан унга ишониб топшириш мумкин, деган қарорга келди. Хираининг ўзи эса компанияни бутунлай тарк этиш ниятида эмас, у Sony директорлар кенгаши раиси курсисини эгаллаши кутилмоқда.
