Навоий вилояти Кармана туманида аҳоли томонидан коммунал тўловлар учун тўланган пулларни ўзлаштирган корхона раҳбари ва ишчисига нисбатан жиноий иш қўзғатилган. Бу ҳақда Бош прокуратура ҳузуридаги иқтисодий жиноятларга қарши курашиш департаменти хабар бермоқда.
Маълум қилинишича, Бош прокуратура ҳузуридаги Департаментнинг Кармана туман бўлими томонидан ўтказилган терговга қадар текширувида «N.A.» хусусий корхонаси раҳбари А.И. ва оператори П.М.лар коммунал тўловлар учун аҳолидан Paynet шохобчаси орқали қабул қилинган тўловларни ўзлаштириб юборгани аниқланган.
Улар тўловларни абонентларнинг ҳисобрақамига ўтказмасдан, фуқароларга тўлов амалга оширилганлиги ҳақида квитанциялар бериб, жами 244 нафар фуқаронинг 39,8 миллион сўм пулларини ўзлаштирган.
Қайд этилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
