2017 йилда ташкил этилган Futbol TV телеканали ребрендингини эълон қилди.
2017 йилда иш бошлаган Futbol TV телеканали кейинги 2022/2023 йилги мавсум учун ТОП-5 чемпионатларини трансляция қилиш ҳуқуқини қўлга кирита олмагани ортидан аввалги мавсумлардаги ўйинларнигина эфирга узатиш билан кифояланаётган эди. Шунингдек, Европа чемпионлар лигаси, Европа лигаси, Европа конфедерациялар кубоги, айни пайтда Қатарда бўлиб ўтаётган жаҳон чемпионати баҳсларини эфирга узатиш имконидан маҳрум бўлди.
Футбол бўйича Англия ва Испания чемпионатлари баҳсларини Россия ҳамда Марказий Осиё давлатлари ҳудудида трансляция қилишнинг экзклюзив ҳуқуқини Setanta Sport харид қилган ва ҳозирда ушбу мусобақалардан ўрин олган ўйинларни онлайн намойиш этиб келмоқда.
Италия А серияси, евролигалар (Европа чемпионлар лигаси, Европа лигаси, Европа конфедерациялар кубоги, Миллатлар лигаси), айни пайтда Қатарда бўлиб ўтаётган жаҳон чемпионати баҳслари МТРКнинг Sport телеканали томонидан эфирга узатилиб келмоқда. Бюджетдан молиялаштириладиган Sport TV келишув миқдорини очиқлагани йўқ.
Kun.uz манбаларининг маълум қилишича, Sport TV томонидан трансляциялар ҳуқуқи уч йилга сотиб олинган. Шу сабабли амалда деярли фаолият кўрсатмаётган, ретрансляциялар билан эфирни тўлдириб турган Futbol TV ребрендинг эълон қилди.
Унга кўра телеканал бундан буён FTV деб номланади ва унда ўзбек, рус, турк ва жаҳон эстрадаси юлдузлари иштирокидаги машҳур клиплар, спорт, кино, кўнгилочар кўрсатувлар эфирга узатилади.
Ўзбекистонда илк футболга ихтисослашган Futbol TV телеканали 2017 йил январда UzReport телеканали қошида ташкил этилганди. Телеканал фаолиятини 2017 йил 23 апрелдан бошлаган, ўша куни “Реал” ва “Барселона” клублари ўртасидаги баҳс жонли эфирга узатилганди.
