Россия мухолифати етакчисининг заҳарланиши ҳақидаги фильм PGA талқинига кўра энг яхши ҳужжатли фильм номига сазовор бўлди.
«Навалний» фильми Америка продюсерлар гильдиясининг (Producers Guild of America, PGA) энг яхши ҳужжатли фильм учун мукофотини қўлга киритди. 26 февраль, шанба куни PGA Twitter аккаунтида эълон қилинган постда фильм «ажойиб продюсерлик» учун тақдирлангани айтилади.
Канадалик режиссёр Дэниел Роэрнинг лентасида россиялик мухолифатчи Алексей Навалнийнинг 2020 йил августида заҳарлангани, унинг даволаниши, комадан чиққани ва сиёсатчининг заҳарланиш ҳолатларини ўрганиши ҳақида сўз боради. Фильм Навалнийнинг Россияга қайтиши, у ерда ҳибсга олингани, «Ив Роше» иши бўйича судлангани ва колонияга жўнатилгани билан якунланади.
Фильмнинг премьераси 2022 йил январь ойида Sundance Америка мустақил кино фестивалида бўлиб ўтди, унда фильм «Ҳужжатли фильм» номинациясида томошабинлар мукофоти ҳамда Festival Favorite Award мукофоти совриндори бўлди. Фильм Cinema Eye Honors халқаро ҳужжатли фильмлар фестивалида яна иккита мукофотга сазовор бўлди – кино ишлаб чиқариш соҳасидаги улкан ютуқлари ва томошабинлар эътирофи.
Бундан ташқари, «Навалний» «Энг яхши ҳужжатли фильм» номинациясида Британия кино ва телевидение академияси (BAFTA) мукофотини олди, шунингдек, 12 март куни ўз эгаларига топшириладиган Америка кино санъати академияси мукофотининг («Оскар») номзодлар рўйхатига кирди.
